ភ្នំពេញ៖ នាយករដ្ឋមន្ត្រីកម្ពុជាសម្ដេចតេជោ ហ៊ុន សែន បានជួបជាមួយនឹងមេដឹកនាំយោធានៃប្រទេសមីយ៉ាន់ម៉ាគឺលោកមីន អោងលាំង នៅព្រឹកថ្ងៃទី២ ខែឧសភា ឆ្នាំ២០២២នេះ។ ដែលជំនួបនេះគឺជាលើកទី៣ ហើយបន្ទាប់ពីសម្ដេចបានអញ្ជើញទៅជួបដោយផ្ទាល់នៅប្រទេសមីយ៉ាម៉ាកាលពីថ្ងៃទី៧ ខែមករា ឆ្នាំ២០២២។
នៅមិនទាន់មានព័ត៌មានលម្អិតអំពីជំនួបនេះនៅឡើយទេ ដោយរង់ចាំក្រសួងការបរទេសដែលនឹងចេញសេចក្ដីប្រកាសព័ត៌មាននៅពេលបន្ទាប់។
កាលពីថ្ងៃទី២៣ ខែមេសា ក្នុងពេលដែលសម្ដេចតេជោ អញ្ជើញចូលរួមក្នុងកិច្ចប្រជុំកំពូលស្ដីពីបញ្ហាទឹកតំបន់អាស៊ីប៉ាស៊ីហ្វិកលើកទី៤ នៅប្រទេសជប៉ុន និងបានជួបជាមួយពិភាក្សាជាមួយនឹងនាយករដ្ឋមន្ត្រីជប៉ុន ដោយ សម្ដេចតេជោ បានប្រាប់នាយករដ្ឋមន្ត្រីជប៉ុនថា សម្ដេចគ្រោងជួបមេដឹកនាំយោធាមីយ៉ាន់ម៉ា លោក មីន អោងលាំង សារជាថ្មីដើម្បីជំរុញយ៉ាងណាឱ្យកុងសង់ស៊ីសទាំង ៥ចំណុចរបស់អាស៊ានមានដំណើរការទៅមុខបន្តទៀត។
គួរឱ្យដឹងផងដែលថាសម្ដេចតេជោ បានជួបជាមួយនឹងមេដឹកនាំយោធាមីយ៉ាន់ម៉ា មីន អោងលាំង ចំនួនពីរដងរួចហើយ គឺកាលពីថ្ងៃទី៧ ខែមករា ឆ្នាំ២០២២សម្ដេចបានទៅជួបផ្ទាល់ និងនៅអំឡុងខែកុម្ភៈសម្ដេចបានជួបតាមរយៈវីដេអូពីចំងាយ។
ជំនួបទាំងពីរនេះគឺសម្ដេចចង់ជំរុញឲ្យមានដំណោះស្រាយសម្រាប់មីយ៉ាន់ម៉ា ក៏ដូចជាការរំលឹកឲ្យមេដឹកនាំមានគោរពការកិច្ចសន្យារបស់ខ្លួន៕
